Esquerda Unida estrea unha nova sede na Sagrada Familia e reúnese coa Asociación de Veciños dos Mallos

Remataron as reformas do novo local de Esquerda Unida, sito na rúa Cardenal Cisneros Nº 80 Baixo, que a partires de agora será a nova sede comarcal. Xa que logo, Esquerda Unida inaugura a súa nova sede comarcal para dar cobertura as demandas da cidadanía da zona dos Mallos e a Sagrada Familia. Fiel a súa aposta pola participación cidadá para que a veciñanza teña maior poder de decisión, o Consello Comarcal de EU Coruña convida á cidadanía a achegarse á nova sede para que poidan trasladar en persoa as preguntas e suxestións que consideren oportunas.

O coordinador comarcal de EU, César Santiso, indicou que “nos últimos meses moitas persoas chamábanos para preguntar pola nosa localización, afirmando que non atopaban a nosa sede sita na rúa Corcubión no barrio do Agra, por iso eliximos un baixo con visibilidade para que a veciñanza teña máis doado participar na vida política coruñesa a través de Esquerda Unida”. Finalmente Santiso subliñou o carácter aberto de EU, como demostra o feito de que calquera persoa pode acudir a súas asembleas. “Esperamos que agora lles sexa máis doado localizarnos”.

Reunión coa A.VV. Mallos - Sagrada Familia - Estación. 

Por espacio de dous horas desenvolveuse unha xuntanza entre Esquerda Unida e a AAVV Os Mallos, Sagrada Familia e Estación. A delegación de EU estaba formada polo coordinador comarcal, César Santiso, o responsábel de organización, Jorge Gil Morabes e Jesús Liste membro do consello comarcal e veciño do barrio. Mentres que a da AAVV a constituía a presidenta Aída Antón, a vicepresidenta Dolores Paz, a Secretaria Mª Luísa García e os vocais José Fernández e Ana Alba.

A reunión enmarcase dentro da rolda de xuntanzas que EU está a desenvolver co tecido asociativo coruñés, logo das desenvolvidas coa AVVV Os Castros-San Diego, a AAVV Los Rosalés ou a AAVV Castrillón, para tomar nota das demandas da veciñanza. O consello comarcal de EU Coruña presentou as súas propostas en canto a participación cidadá mediante orzamentos participativos e o seu Plan Integral de Mobilidade Universal e Sostíbel (PIMUS)

A presidenta da AAVV valorou positivamente a proposta de participación cidadá ao tempo que indicou que se debe traballar moito a implicación da veciñanza para poder chegar até un desenvolvemento eficaz dos orzamentos participativos. Por outra banda subliñou que a mobilidade é o problema máis grave do barrio, o que achacou ao exceso de vehículos. César Santiso explicou a imperiosa necesidade de reducir o uso dos vehículos privados a motor para reducir o caos circulatorio, a contaminación, as emisións de CO2 e o insostíbel consumo enerxético. Por iso, avogou por unha mellora cuantitativa e cualitativa do transporte público colectivo para facelo atractivo a cidadanía. Santiso citou entre outras medidas:

- Creación de aparcadoiros disuasorios gratuítos nas entradas da cidade conectados mediante transporte público baseado en metrobuses híbridos que transiten por carril bus, para evitar a entrada de miles de vehículos.

- Implantación do billete único progresivo diario que permita a utilización universal do transporte público a través do pagamento do billete único no primeiro viaxe e un incremento do 10% do importe inicial en cada transborde ao longo do día.

- Creación de liñas concéntricas que permitan mobilidade entre barrios sen pasar polo centro.

Ver artigo especial neste blog sobre as: Eleccións Municipais 2011