Visita ao MACUF en lingua inglesa. Sábado, día 19 de decembro de 2009, ás 12:00 horas. O Museo de Arte Contemporánea Gas Natural-Unión Fenosa continúa ofrecendo visitas dialogadas en lingua inglesa á exposición da súa Colección. Dentro deste programa, que se dirixe tanto a visitantes foráneos como a estudantes de inglés, se convoca unha quenda extraordinaria de carácter aberto, que terá lugar o próximo sábado, día 19 de decembro de 2009, ás 12:00 horas. Todos os interesados haberán de presentarse a esa hora no vestíbulo do Museo. O programa funcionará de xeito ininterrompido, pero con necesidade de reserva previa, ata o sábado 6 de febreiro de 2010 (inclusive). E aproveitamos a ocasión para anunciar a posibilidade de desenvolver en lingua inglesa o resto das actividades educativas do Museo (resumidas en
http://www.macuf.com/htdocs/educacion.html), sempre que se solicite coa antelación necesaria.
www.macuf.es---------------------------------------------
Música Animada, (concertos para toda a familia). Domingo 20 de decembro de 2009, 12 h 30. LA SELVA SOÑADA, Grupo de percusión Attacca. Unha tempada máis, o ciclo de concertos MÚSICA ANIMADA vén cargado de divertidas historias para todas as idades. Continuaremos as peripecias de personaxes xa coñecidos polo noso público habitual, e presentaremos algúns dos máis famosos contos da literatura infantil, con acompañamento musical creado para a ocasión. Grazas ao enfoque didáctico de cada concerto, os máis pequenos traballarán nocións musicais básicas, como o seguimento de patróns rítmicos e melódicos, ou o coñecemento dos distintos instrumentos e estilos musicais, sempre dunha forma lúdica e divertida. Con este proxecto pretendemos que as mañás de domingo sigan sendo, como ata agora, un momento para toda a familia.
CONDICIÓNS DE ACCESO: Para garantir a comodidade e seguridade dos asistentes, dende este domingo só se permitirá o acceso ao auditorio a aquelas persoas que teñan garantida unha localidade de asento. A partir das 11:30 horas, e por rigorosa orde de chegada, a recepción do Museo expedirá un número limitado de etiquetas adhesivas, que os asistentes deberán levar en lugar ben visible para poder acceder ao auditorio. As portas do auditorio abriranse ás 12:15 horas, e o persoal do Museo axudará a acomodar os asistentes, reservando sempre para os nenos as localidades máis próximas ao escenario. Agradecémoslles de antemán a súa colaboración, e recordámoslles que está terminantemente prohibido tocar as obras expostas, así como realizar fotografías con flash dentro do recinto do Museo.www.macuf.es---------------------------------------------
Cursos de escritura creativa "Mundos de Papel". “MUNDOS DE PAPEL”, Ánxela Gracián, todos os martes, de xaneiro a xuño de 2010, de 19:30 a 21:30 h. Achégate ao concepto de literatura como xogo, como fonte de coñecemento de ti mesmo e como material para entender mellor o teu mundo, afondando na túa capacidade para inventar mundos de papel.
MUNDOS DE PAPEL é un taller literario no que se traballarán aspectos especificamente literarios e paraliterarios que interveñen na elaboración dun texto. Ao longo das distintas sesións, intentaremos que coñezas as claves para chegar a ser escritor, revisando as distintas fases do proceso creativo, dende eses primeiros atoutiños nos que garabateas versos cheos de emoción y experiencias persoais, no tan temido folio en branco, dando conta desa capacidade para fabular e crear mundos que formulan un pensamento propio froito da túa creatividade ata ese momento final en que xa tes nas túas mans ese obxecto ao que chamamos libro.
MUNDOS DE PAPEL é tamén un achegamento formal á parte técnica que subxace a todo texto literario. Neste taller ensinarémosche a ler creativamente, a aguzar a percepción dos sentidos, a descubrir os mecanismos que poñen en marcha a imaxinación que todos levamos dentro e, sobre todo, a afianzar a disciplina da creación, formulando reflexións que contribúan a que te enfrontes ao acto literario coa mirada do escritor e escritora que desenvolveu ese instinto que lle permite “atrapar” boas historias, porque interiorizou as experiencias da imaxinación, da lectura e, en xeral, da vida e puido convertelas narración, en novela, en MUNDOS DE PAPEL.
www.macuf.es
